پوری بات سن کر

آدھی بھول جانی تھی

خود سے ہی جو کہتی رہی

اسے پاس بٹھا کر بتانی تھیں

مجھے اس کی چاہ ہے

ایک ہی بار بتانے والی بات

کئی کئی بار نہیں دہرانی تھی

اوروں نے جو بتلائی، وہی کہانی

ایک بار اُس سے بھی پوچھ لینی تھی

میں اسے ڈھونڈتے ڈھونڈتے

موجود سے غیر موجود میں

لامکاں سے مکاں میں

خود تھکنے لگی ہوں

اپنے سائے میں بیٹھتی ہوں تو

سایہ جسم سے بڑھنے لگتا ہے

دل راستہ، عشق مسافر، خواب راہنُما

منزل ساتھ ساتھ بتلاتی ہے

وہ مل جائے تو حاصل کا خالی پن

اور نہ ملے تو لاحاصل کی وحشت۔۔۔

فرح

آسمان، کنکریٹ کے جِن اور ماتڑ لوگ
دیکھ کے دل، ایک نہیں کئی بار دہلتا ہے
بُلندی بڑی توجہ طلب ہوتی ہے
اور توجہ ایمانداری سے پھوٹتی ہے
اِدھر پل بھر کی کوتاہی
اُدھر کہانی کا tragic end
جانے کتنے گھروں کے چراغ بُجھیں گے
حاکموں کے بس امداد کے اعلان
افسوس کے بیان
اور انکوائری کے احکام آئیں گے

آنکھ کے پاس قدرت نہیں رہی
تا حدِ نظر عمارتیں ہی عمارتیں
جیسے ہوا میں لٹکے اُلو
اپنا آپ نوچ رہے ہوں
ماڈرنٹی ناشتے کی میز پر
ہمارا ورثہ کھا رہی ہے
شہر کی تہذیب آئی سی یو میں
الوداعی ہچکیاں بھر رہی ہے

لارنس کے پرندے، ایم ایم عالم کا فٹ پاتھ، کینال کے درخت
شہر کی تاریخی کتاب میں ملیں گے
دوست، احباب، رشتے، ناطے۔۔۔سارے
کریڈٹ کارڈ سے آن لائن دستیاب ہوں گے
خوشیاں ٹی سی ایس سے ہوم ڈلیور ہوں گی
بھائی سانس لینے کی قیمت ہو گی
زندگی بھی capitalist کی پروڈکٹ ہو گی
البتہ موت فری آف کاسٹ ہو گی
انسان بننے کی پھر سخت سزا ہو گی۔۔۔

فرح