خواب مر گئے ہیں
بس اب ہوں
جانے کہاں ہوں
کسں لئے ہوں
ٹھرا ہوا ہوں
نہیں' شاید چل رہا ہوں
نہیں نہیں۔۔۔الٹے دل بہہ رہا ہوں
رینگ رہا ہوں
کہنیوں کے بل
گرم ریت پر
الاسکا کے پہاڑوں میں
سورج کی پیشانی پہ
ہاں ہاں ہاں۔۔۔ وہ جو چاہ تھی منزل کی
اُسے اپنی روح سے کھرچ کر
کوڑے دان میں پھینک آیا ہوں
اب پکے فرش پہ بیٹھ کے
برفیلی ہوا کی چپیڑوں سے
خون نالیوں میں جما رہا ہوں
سگریٹ سے ماحول گرما کر
اپنا آپ redefine کرنے والا ہوں
دیکھو!
میں اپنے خواب کے ساتھ
 خود بھی مرنے والا ہوں۔۔۔

یہ شب گزاری
آسان نہیں صاحب
خود کا لہو جلا کر
روشنی کو جننا ہے
اپنے ہی سائے کے دائرے میں بیٹھ کر
زمانے کی قید کاٹنی ہے
نیند کے پہرے پہ
آنکھ نہیں جپکھنی
سانس روک روک کر
وقت بچانا ہے
تمنا پہ قدم رکھ کے
اگلی سیڑھی پہ چڑھ جانا ہے
یہاں کسی کو چھوڑ کر
وہاں پھر کسی اور سے ملنا ہے
جو ہاتھ پہ رکھی ہوئی ہے
اُسی سے اوپر اُٹھ کر
تم نے اُسے پانا ہے
جس کے مرکز سے جدا ہو کر
تم بھٹکنے لگے تھے
اور آج تک بھٹک رہے ہو
سُنو!
تم لوٹ جاؤ
ابھی ہی لوٹ جاؤ
اس سے پہلے کہ تمھارے زہہن سے
واپسی کا نشان مٹ جائے
اور تم اپنے ہی گرد گھومتے گھومتے
 ریت کی مُٹھی کھول دو۔۔۔