میں نظم کس کے لئے لکھوں

12:01:00 Farah Deeba Akram 0 Comments

میں نظم کس کے لئے لکھوں
ڈرائینگ روم کے پردے سے کتاب کا کور میچ کرنے والی بیگم صاحبہ کے لئیے
ڈائجسٹ کی کہانیوں میں شہزادے تراشنے والی کچی عُمر کی پکی لڑکیوں کے واسطے
سوشل میڈیا پہ سینکڑوں لائکس اور تعریفی کمنٹس کے لئے
گروپ بندی کے شکار جعلی مشاعروں میں روایتی واہ واہ کی صدا کی خاطر
کمرشل ادب کے مائی باپ بزنس مین پبلشر کے لئے
بھائی پاپولر ادب میں نھیں لکھ سکتی
ایسی شھرت پہ تھوکوں بھی ناں
مجھے اپنے لئے لکھنا ہے
اپنے احساس کو لکھنا ہے
محنت کش مزدور کی بات سُناوں گی
بارش میں ٹپکتی چھت کے نیچے
برتن ھاتھ میں تھامے بچے کو لکھوں گی
وزن سے دبی کمر کا خم لکھوں گی
بھوکے پیٹ، ننگے پاؤں، پیاسے لب
ھاتھ میں سوال اور دل میں ملال لئے
سڑکیں ناپنے والے بچے کا احوال لکھوں گی
سرکار کی پارک میں بیٹھے میاں بیوی، دو بچے
ایک پیکٹ بسکٹ کو بانٹ کے کھانے کا بیان لکھوں گی
ماں کے علاج کے پیسے پورے نہ ہونے پر
بےبس اولاد کا پُرشکوہ غم لکھوں گی
ایک بڑے گھر کے بننے میں
کتنے چھوٹے گھر مسمار ہوتے ہیں
اُن کا حساب لکھوں گی
اور نجانے کتنے احساس ھیں
جنھیں لفظ ملنے باقی ھیں